Gjykata e Gjirokastrës ka vendosur të mbajë në burg Thoma Mastoran, i akuzuar për vrasjen e një çifti në Dropull. Ai përballet me akuzat për “vrasje në rrethana cilësuese” dhe “armëmbajtje pa leje”.
Në seancën e drejtuar nga gjyqtarja Mariola Beluli, prokurorja Blerina Musabelliu sqaroi ngjarjen e të premtes së kaluar, duke prezantuar prova materiale dhe shkencore. Ajo kërkoi masën e sigurisë “arrest në burg” pa afat për Mastoran. Ndërkohë, avokati i caktuar nga shteti, Jorgo Kasapi, kundërshtoi akuzat, duke pretenduar se Mastora është i pafajshëm pasi nuk ka qenë autori i krimit.
Gjykata e Shkallës së Parë të Juridiksionit të Përgjithshëm Gjirokastër, në seancën e mbajtur më 8 maj 2023, vendosi:
1. Vlefshmëria e arrestimit: Thoma Mastora, i dyshuar për “vrasje në rrethana cilësuese” dhe “armëmbajtje pa leje”, sipas neneve 79/dh dhe 278/3 të Kodit Penal, të mbahet në burg.
2. Masa e sigurisë: Caktimin e masës së sigurisë “Arrest në burg” ndaj Mastoras, sipas nenit 238 të Kodit të Procedurës Penale.
Gjykata ngarkon Prokurorinë e Gjirokastrës, në bashkëpunim me Policinë, për zbatimin e vendimit.
Vendimi mund të apelohet në Gjykatën e Apelit brenda pesë ditëve nga shpallja e tij.
