Është arrestuar në aeroportin e Rinasit, shtetasi 22-vjeçar, i identifikuar si Mirand Abazi. Ky i fundit mësohet se ishte shpallur në kërkim nga Holanda i akuzuar për veprën penale të vrasjes, pastrimit të parave dhe vjedhjes. Pas arrestimit të tij në Rinas, synohet që ky i fundit të ekstradohet për në Holandë ku pritet të kryejë dënimin që do i jetë caktuar nga gjykata holandeze.
Njoftimi i Plotë:
Rinas
Policia Kufitare e Rinasit vë në pranga një shtetas të shpallur në kërkim ndërkombëtar nga autoritetet e zbatimit të ligjit të Holandës.
Shërbimet e Policisë Kufitare të Rinasit, si rezultat i shtimit të kontrollit për verifikimin e dokumentacionit të qytetarëve në hyrje dhe në dalje, me qëllim kapjen e personave në kërkim, falë edhe shkëmbimit të informacionit me Interpol Tiranën, ndaluan shtetasin Mirand Abazi, 22 vjeç, banues në Belgjikë.
Ky shtetas u kap në hyrje të Republikës së Shqipërisë dhe u arrestua me qëllim ekstradimi, pasi gjatë përpunimit të dokumentacionit dhe shkëmbimit të informacionit me Interpol Tiranën, rezultoi se ishte person i shpallur në kërkim ndërkombëtar nga Holanda, për veprat penale “Vrasja në rrethana cilësuese”, “Vjedhja me dhunë”, “Pastrim parash” dhe “Shkatërrimi i pronës”, parashikuar nga Kodi Penal i Holandës.
Personi në kërkim ndërkombëtar u dërgua në ambientet e paraburgimit të DVP Tiranë, në dispozicion të Prokurorisë së Rrethit Gjyqësor Tiranë.
