Policia shqiptare ka vënë në pranga një 40-vjeçar të shpallur në kërkim ndërkombëtar nga autoritetet italiane për trafikim të lëndëve narkotike.
I arrestuari, Emrulla Tomja, i njohur edhe me identitetin Emrulla Elezi, u kap gjatë operacionit të koduar “Operacionalja 50”, i zhvilluar nga Forca e Posaçme Operacionale në bashkëpunim me rrjetin ENFAST dhe policinë italiane.
Sipas njoftimit zyrtar, arrestimi u krye në qytetin e Dibrës si rezultat i kordinimit mes strukturave shqiptare dhe partnereve ndërkombëtarë për lokalizimin dhe ndalimin e shtetasve të kërkuar për krime të rënda në hapësirën europiane.
Për Emrulla Tomjën është lëshuar urdhër arresti nga Gjykata e L’Aquilas në Itali, e cila i ka caktuar atij masën e sigurisë “arrest në burg” për akuzën e trafikimit të narkotikëve, një vepër penale që, sipas Kodit Penal italian, dënohet me mbi 4 vjet burgim.
Pas kapjes, ndaj tij kanë nisur procedurat për ekstradimin drejt Italisë, ku pritet të përballet me drejtësinë për aktivitetin e paligjshëm të zhvilluar në territorin italian.
