Guvernatori i New York Andrew Cuomo ka dhënë dorëheqjen pas akuzave të shumta për sulme seksuale. Hetimi i prokurorisë doli në përfundimin se ai ka ngacmuar seksualisht 11 gra, ndërsa presioni ndaj tij për t’u larguar u rrit me kalimin e kohës. Edhe vetë presidenti Joe Biden kërkoi që ai të jepte dorëheqjen, edhe pse Cuomo u pa gjatë pandemisë si një kandidat i mundshëm presidencial.
Cuomo, një demokrat i cili ka shërbyer që nga viti 2011 si guvernator i shtetit të katërt më të populluar në SHBA, e bëri njoftimin pasi Prokurorja e Përgjithshme e Nju Jorkut Letitia James më 3 gusht publikoi rezultatet e një hetimi pesë mujor të pavarur që arriti në përfundimin se ai ishte angazhuar në sjellje që shkelte ligjet amerikane dhe shtetërore.
Në një fjalim televiziv, 20-minutësh, Cuomo përsëri mohoi çdo akuzë, megjithëse ai tha se ai pranoi “përgjegjësinë e plotë” për ofendimin e grave përmes atyre që ai i karakterizoi si përpjekje të keqkuptuara për të qenë i dashur ose me humor.
Ai tha se kishte arritur në përfundimin se luftimi i akuzave gjatë qëndrimit në detyrë do të paralizonte qeverinë e shtetit dhe do t’u kushtonte taksapaguesve miliona dollarë në një kohë kur pandemia e koronavirusit ende paraqet një kërcënim të madh.
“Unë mendoj, duke pasur parasysh rrethanat, mënyra më e mirë që mund të ndihmoj tani është nëse largohem mënjanë dhe e lë qeverinë të bëjë detyrën- dhe për këtë arsye kjo është ajo që unë do të bëj”, tha Cuomo duke shtuar se dorëheqja e tij do të hynte në fuqi në 14 ditë
