Prokuroria e Posaçme Kundër Korrupsionit dhe Krimit të Organizuar i ka paraqitur Gjykatës së Posaçme kërkesën për gjykimin e pesë personave të dyshuar për korrupsion zgjedhor në zgjedhjet vendore të vitit 2023 në Bashkinë Rrogozhinë. Në qendër të çështjes është Shkëlqim Hoxha, ish-kandidat i koalicionit “Bashkë Fitojmë”, i cili akuzohet se, ndonëse kishte dijeni për veprimtarinë e paligjshme, nuk e kallëzoi atë pranë autoriteteve kompetente.
Sipas kallëzimit të SPAK, Engjell Cara, Limon Shala, Fatmir Thaçi dhe Florant Saraçi u vënë nën hetim për “Korrupsion aktiv në zgjedhje”, vepër e kryer në bashkëpunim dhe më shumë se një herë, të parashikuar nga nenet 328, 25 dhe 50, germa h, të Kodit Penal. Ndërkaq, Shkëlqim Hoxha përballet me akuzën “Moskallëzim i krimit”, bazuar në nenin 300 të Kodit Penal.
Hetimet, të cilat u mbështetën në prova materiale dhe analiza ligjore, treguan se të pandehurit siguruan dhe shpërndanë bileta udhëtimi të parapaguara për të paktën 64 votues që jetonin jashtë vendit. Qëllimi, sipas organit të akuzës, ishte kthimi i tyre në Shqipëri për të votuar në favor të Hoxhës në zgjedhjet e përsëritura të korrikut 2023 për Bashkinë Rrogozhinë.
Dosja sqaron se Hoxha ishte i vetëdijshëm për veprimet e Fatmir Thaçit dhe Limon Shalës, të cilët koordinonin blerjen dhe ofrimin e këtyre biletave. Megjithatë, kandidati demokrat nuk e raportoi skemën, duke shkelur detyrimin ligjor për të denoncuar krimin.
Në garën e korrikut 2023, Hoxha humbi përballë kandidatit socialist Edison Memolla. Pas këtij rezultati, strukturat hetimore të Policisë së Durrësit referuan informacionet që çuan në regjistrimin e dy procedimeve penale, nr. 161 dhe nr. 162 të vitit 2023, të cilat u bashkuan në një çështje të vetme për shkak të përputhjes së fakteve dhe personave të përfshirë.
Me dorëzimin e kërkesës së SPAK-ut, çështja kalon tani në duart e Gjykatës së Posaçme, e cila do të vendosë mbi fajësinë apo pafajësinë e të pandehurve për akuzat e ngritura. Nëse deklarohen fajtorë, ata përballen me dënime që variojnë sipas dispozitave përkatëse të Kodit Penal.
