Ditën e sotme Komisioni i Ligjeve miratoi në parim paketën “Anti-shpifje” të propozuar nga qeveria.
Kjo paketë ligjore është kundërshtuar me forcë nga përfaqësues të medias, shoqërisë civile, organizata ndërkombëtare, opozita jashtë parlamentit dhe ajo brenda saj.
Gjithashtu gjatë ditës së sotme, Partia Demokratike zhvilloi një tryezë të përbashkët me përfaqësues të mediave dhe të shoqërisë civile, të cilët shpalosën qëndrimet e tyre kundër propozimit të qeverisë, duke e quajtur cenim të fjalës së lirë dhe kthim në diktaturë.
Në lidhje me zhvillimet e ditës së sotme, ka reaguar edhe kryeministri Edi Rama.
Në një postim në rrjetet sociale, shefi i qeverisë shkruan, se projektligji është konsultuar nen për nën me OSBE-në.
Sipas kryeministrit, paketa ligjore nuk cënon lirinë e shprehjes dhe të drejtën për t’u informuar.
Përsa i përket akuzave për ERTV, Rama u shpreh se kush nuk do mund të largohet nga faqja e tij.
Postimi i Ramës
Ose s’e kanë lexuar projekt-ligjin ose duan të prekin lirisht dinjitetin e çdokujt nëpër portale e faqe sociale dhe të tallen me të vërtetën e me opinionin publik, duke shkruar çfarë t’u teket, duke shpifur sa e si t’u teket, duke shantazhuar e duke i vënë gjoba kujt t’u teket!
Projekt-ligji është konsultuar e përpunuar prej një viti, nen për nen e pikë për pikë me OSBE dhe do të hyjë në seancë pa asnjë cen në aspektin e standarteve të lirisë për t’u shprehur e të së drejtës për t’u informuar pa kufizim,po edhe të mundësisë për t’u mbrojtur nga shpifjet.
Sa për “ERTV” faleminderit për publicitetin dhe mos ma prekni ju lutem fjalën time të drejtëpërdrejtë, për të gjithë ata që hyjnë pa asnjë detyrim në faqen time të fejsbukut, ku po u pëlqeu rrinë po s’u pëlqeu ikin.
