Më 31 mars, Partia Demokratike denoncoi në konferenca të njëpasnjëshme abuzimin me tenderin pa garë 1.5 milionë euro të ushqimit.
Përmes një deklarate për mediat, PD thekson se ky tender i realizuar me urgjencë në këtë kohë krize është një aferë e pastër korruptive dhe klienteliste, ndërsa liston edhe argumentet e bazuar në dokumente.
Më 1 prill, PD kallëzoi në SPAK ministren e Mbrojtjes Olta Xhaçka për tenderin e ushqimit për Rezervat e Shtetit.
Fillimisht, ish-deputeti i PD-së, Enkelejd Alibeaj doli në dy konferenca për shtyp duke i kërkuar përgjigje lidhur me tenderin Xhaçkës dhe kryeministrit Edi Rama, pasi sipas tij, nga 35.099 kompani në garë për tenderin 1.5 milionë eurosh për blerjen e ushqimeve për Rezervën e Shtetit kishte fituar “Eurovia” shpk., nga Maqedonia e Veriut.
Alibeaj akuzoi se kompania ishte regjistruar në Shqipëri thuajse një vit më parë, më 19 mars të 2019 dhe kishte administrator Emir Shefitin, një pronar kompanie bastesh sportive të regjistruar në Tetovë, të quajtur “Sports and More”.
Aktiviteti i kompanisë ka qenë i lidhur kryesisht me pajisje elektronike, ndërtim dhe sisteme kompjuterike por vetëm 6 ditë para tenderit kanë shtuar edhe “tregëtim ushqimesh”.
LEXO: Tenderi 1.5 milionë euro i ushqimit, PD çon në SPAK ministren Olta Xhaçka
Tashmë Struktura e Posaçme Kundër Korrupsionit (SPAK) ka filluar hetimet për tenderin sekret të ushqimeve nga Ministria e Mbrojtjes që u denoncua nga PD.
Sot SPAK ka marrë në pyetje 3 anëtarët e komisionit të vlerësimit të ofertave, Ylli Ymerin, Dafina Meçan dhe Adriatik Dapajn për këtë tender të dhënë në fund të marsit.
Vetë ministrja e Mbrojtjes Olta Xhaçka ka mohuar akuzat dhe ka thënë se çdo gjë do ia lëjë në dorë drejtësisë.
