Ministria për Evropën dhe Punët e Jashtme ka reaguar lidhur me përshkallëzimin e konfliktit në Lindjen e Mesme, duke informuar se është në ndjekje të vazhdueshme të situatës së shtetasve shqiptarë që ndodhen aktualisht në Izrael.
Sipas të dhënave të siguruara, janë identifikuar pesë shtetas shqiptarë në territorin izraelit, tre prej tyre ndodhen atje me status turisti dhe dy të tjerë me qëndrim të përkohshëm.
Fatmirësisht, deri në këto momente nuk ka raportime për persona të lënduar apo në rrezik.
MPJ bën të ditur se Ambasada Shqiptare në Tel Aviv është në kontakt të rregullt me qytetarët shqiptarë, të cilët ndodhen në gjendje të mirë shëndetësore dhe janë të informuar për zhvillimet, duke ndjekur udhëzimet e sigurisë të dhëna nga autoritetet izraelite.
Për shkak të përkeqësimit të situatës së sigurisë, Ministria njofton se fluturimet nga dhe drejt Izraelit janë pezulluar përkohësisht.
Qytetarët shqiptarë që ndodhen në Izrael dhe kanë nevoja urgjente, mund të kontaktojnë Ambasadën përmes numrave emergjentë të publikuar më parë.
Ndërkohë, konflikti mes Izraelit dhe Iranit ka hyrë në një fazë të re përshkallëzimi. Izraeli nisi të premten një ofensivë të gjerë ajrore me objektiv shkatërrimin e infrastrukturës ushtarake dhe bërthamore të Iranit. Si kundërpërgjigje, Teherani lëshoi një seri sulmesh të sinkronizuara me raketa dhe dronë në drejtim të territorit izraelit, duke goditur zona të ndryshme ushtarake dhe civile. Deri tani, të dyja palët kanë konfirmuar viktima dhe qindra të plagosur.
MPJ thekson se po monitoron zhvillimet nga afër dhe mbetet në gatishmëri për çdo situatë të re që mund të prekë qytetarët shqiptarë në rajon.
