Aktorja e njohur Ema Andrea ka folur në një intervistë ndrshe për ngacmimet seksuale që ka pasur në vendin e punës. Për Deutche Welle ajo ka thënë se e ka pasur të vështirë të rritej në karrierë, por kjo gjë e ka bërë më të fortë. Ndërkohë, e pyetur për ngacmimet seksuale ajo ka thënë se ka pasur raste kur ka punuar me njerëz që e kanë respektuar, por edhe me të tjerë që kanë bërë të kundërtën.
“Kam pasur nga të dyja rastet si, bashkëpunëtorë burra që kam punuar mirë, jam respektuar për profesionin, kemi ecur përpara shumë mirë. Si dhe ato raste kur refuzimi apo çdo gjë tjetër që ka qenë kompleksive në personin që ka patur pushtet, e ka përdorur këtë pushtet ose këtë ‘Jo’ ose këtë refuzim, për të mos më dhënë atë që meritoj kur kam patur nevojë.”, është shprehur aktorja.
Ema Andrea ka thënë se në fillim mendonte se ishte gabimi i saj dhe kur kthehet pas kupton se ka humbur mundësi që i ka merituar.
“Në fillim nuk e kupton. Thua ‘ku është gabimi im?’. Ja, kjo është pyetja që të lodh shumë: ‘Çfarë bëra unë që t’i krijoj idenë se kam aq nevojë sa të mund të krijoj raporte banale?.Ka qenë e vështirë ngritja e karrierës, ecja përpara, konsideromi, të pranuarit në profesion. Gjë që më ka bërë më të fortë, më ka bërë të kërkojë forma të tjera të reja. Por kur largohem në distancë kuptoj që kam humbur mundësi që i kam merituar. Dhe kjo natyrisht që e ka bërë më të vështirë. Paguan me vetmi, paguan me paragjykim, paguan me përjashtim”.- ka treguar Ema.
