Shqipëria është që prej ditës së djeshme e bllokuar nga reshjet e borës që kanë rënë në pjesën më të madhe të vendit. Shumë akse të rëndësishme janë të bllokura, duke krijuar kështu vështirësi në qarkullim. Probleme të tilla ka pasur edhe në doganën e Qafë-Thanës që lidh Maqedoninë e Veriut me Shqipërinë. Dhjetra njerëz kanë mbetur të bllokuar prej disa orësh dhe ndër to ka qenë edhe aktorja e njohur Zamira Kita. Ajo ka folur në një lidhje për News 24 duke treguar situatën aktuale që po kalojnë qytetarët. Kita ka thënë se ata gjenden të bllokuar prej gati 2 orësh të bllokuar nga era e fortë dhe bora. Ajo gjithashtu ka bërë apel që situata të marrë sa më shpejt një zgjidhje.
“Kemi gati 2 orë që jemi këtu në Doganën shqiptare, për të dalë nga Maqedonia e Veriut dhe për të hyrë në Shqipëri. Ka një problem nga dogana deri në aksin nacional. Këto janë thashethemet nga qytetarët, por nuk e dimë saktësisht se çfarë ka ndodhur. Mbase autoritetet po punojnë ku është problemi, se nuk e dimë. Por, dy orë në këtë të ftohtë, është shumë e vështirë për njerëzit që gjenden këtu. Këtu fryn shumë erë dhe bie pak borë. Dua të bëj apel, që kjo gjendje urojmë të mbarojë sa më shpejt, të ketë zgjidhje”, ka thënë Kita.
