Pas sinjalizimeve se Aleksandër Laho i njohur ndryshe me nofkën “Rrumi” ndodhej në banesë, policia e Durrësit ka zhvilluar sot kontrolle në shtëpinë e tij.
Laho është në kërkim dhe ndaj tij ka dy urdhër-arreste, një nga Prokuroria e Durrësit dhe një nga SPAK. Ndërkohë theksohet se është shoqëruar i vëllai, Vullnet Muharremi, por më pas është lënë i lirë. Sakaq gjatë aksionit është kapur një person me armë pa leje dhe është arrestuar.
Rrumi është një personazh shumë i përfolur për lidhjet e tij me botën e krimit, ndërkohë që emri i tij u përmend edhe gjatë atentatit ndaj prokurorit Arjan Ndoji ku mbeti i plagosur dhe vetë ai pasi ishte në makinë me prokurorin. Në atë ngjarje mbeti i vrarë shoferi. Aktualisht Laho është shpallur në kërkim, ndërkohë që policia po vijon kontrollet për ekzekutimin e urdhrit të SPAK.
Rrumi është lakuar nga një sërë qytetarësh për zaptim të pronave, madje është denoncuar në disa procese gjyqësore që kanë lidhje me pronat.
Emri i ‘Rrumit’, ka qenë i përfshirë edhe më herët edhe në rrahjen ndaj biznesmenit libanez Faadi Mitri, i cili u dhunua barbarisht në shtator të vitit 2016, në sy të bashkëshortes dhe të vajzës së tij
