Krenar Velaj, 27 vjeç, që ndodhej në qendër të ngjarjes së ndodhur pak ditë më parë në bregdetin e Vlorës, ku një turist gjerman u plagos nga një gomone ndërsa ushtronte zhytje, është liruar nga masa e arrestit me burg.
Në një seancë të zhvilluar me dyer të mbyllura këtë të mërkurë, Gjykata e Vlorës ka ndryshuar masën e sigurisë në “detyrim paraqitjeje”, duke rrëzuar akuzën për plagosje me dashje, të parashikuar nga neni 88 i Kodit Penal.
Vendimi është marrë nga gjyqtari Bevil Beqiraj, i cili argumentoi se nuk ekzistonin kushtet ligjore për të vërtetuar se Velaj kishte qëllim të dëmtonte turistin.
Sipas aktit gjyqësor, Velaj ndodhej në mjetin lundrues duke ndjekur rregullat e qarkullimit detar, ndërsa turisti i plagosur nuk kishte asnjë shenjë identifikuese në vendin ku po ushtronte zhytjen, duke e bërë të pamundur parandalimin e incidentit.
Për më tepër, vendi ku ndodhi ngjarja nuk ishte një zonë e përcaktuar për zhytje, duke i shtuar rrethanave një element të rëndësishëm në favor të 27-vjeçarit.
Ndërkohë, turisti gjerman ndodhet ende në spital, por gjendja e tij është stabilizuar dhe nuk rrezikon jetën. Plagët e marra nga përplasja me helikën e gomones ishin të rënda, por mjekët kanë konfirmuar se ai është jashtë rrezikut.
Hetimet për rastin vijojnë, ndërsa Velaj do të duhet të paraqitet periodikisht pranë Policisë Gjyqësore, në pritje të përfundimit të procesit penal.
