Një aksident tragji ka ndodhur mëngjesin e së martës në Bullgari.
Duke marrë në konsideratë faktin që shumica e viktimave janë nga Maqedonia e Veriut, qeveria e këtij shteti ka shpallur 3 ditë zie për ngjarjen e rëndë ku humbën jetën 46 persona.
Flamujt janë ulur në gjysmë shtizë, në nder të viktimave.
Ngjarja ndodhi afër Sofjes, ku një autobus pas aksidentit u përfshi nga flakët. Vetëm 7 persona kanë arritur që t’i mbijetojnë aksidentit tragjik.
Mes viktimave janë edhe 12 të mitur, dy binjakë. Në aksident ka humbur jetën edhe shoferi. 7 persona, 2 gra dhe 5 burra kanë shpëtuar dhe ndodhen në spital. Ministri i Jashtëm i Maqedonisë së Veriut, Bujar Osmani tha se autobusi po kthehej për në Shkup pas një udhëtimi nga Stambolli.
Maya Argirova, shefe e klinikës së djegieve në Pirogov u shpreh sot se njerëzit janë me trauma të rënda, kanë humbur të afërmit, fëmijët. “Ata u hodhën nga xhamat e autobusit, prej nga kanë marrë lëndimet”, tha Argirova. Autobusi ka hyrë përmes pikës kufitare Kapitan Andreevo mbrëmë pak pas orës 21:00. Rreth orës 3.00 ka ndodhur aksidenti në autostradën në drejtim të Sofjes – Bllagoevgrad.
Pas aksidentit, autostrada e Strumës do të qëndrojë e mbyllur gjatë gjithë ditës, të paktën në drejtimin Sofje-Balgoevgrad, në të cilin udhëtonte autobusi. Aktualisht vazhdojnë hetimet për zbulimin e shkaqeve të aksidentit dhe shpërthimit në flakë të autobusit. Mësohet se 7 persona janë dërguar në spital.
