Sindikata e Minatorëve të Bashkuar të Bulqizës ka reaguar pas ngjarjes së rëndë që ndodhi në minierë, ku humbi jetën minatori 35-vjeçar Eltjon Alla. Në një deklaratë SMBB thotë se ngjarja ka ndodhur në Nivelin e 18 në minierën Albchrome dhe se lajmi ka tronditur gjithë Bulqizën. Më tej thuhet se aksidentet në minierat e Bulqizës po bëhen pothuajse të përditshme dhe me të rrezikshme. Ndërkohë, shteti dhe kompanitë fajësojnë punëtorët dhe nuk ndërmarrin asnjë hetim apo përmirësim të kushteve të punës. Në mbyllje, SMBB i shpreh ngushëllimet familjes së Eltjonit dhe kërkon që të mbahet përgjegjësi për tragjedinë.
Deklarata e plotë:
DITË TRAGJIKE PËR MINATORËT DHE QYTETIN E BULQIZËS
Eltjon Alla, 35 vjeç, minator në Nivelin e 18 në minierën e Albchrome, u aksidentua sot me pasojë vdekjen. Lajmi i vdekjes në punë të Eltit na ka tronditur thellësisht të gjithëve, minatorë dhe qytetarë të Bulqizës, miq, shokë dhe të afërm të tij.
Aksidentet në punë po bëhen pothuajse të përditshme e përherë e më të rrezikshme në minierat e Bulqizës, ndërkohë shteti dhe kompanitë vazhdojnë të fajësojnë punëtorët, duke mos ndërmarrë asnjë hetim apo përmirësim serioz të kushteve të punës.
I shprehim ngushëllimet më të sinqerta familjes dhe të afërmve të Eltjonit, si dhe kërkojmë të mbahet përgjegjësi për këtë tragjedi të radhës.
