Pas aksidenitit të rëndë të ndodhur në minierën e Bulqizës, janë vënë nën hetim tekniku dhe brigadieri për veprën penale “Shkelje e rregullave të mbrojtjes në punë”.
Arrestimi është bërë pasi të dy kanë pasur detyrim ligjor për kontrollin e gjendjes teknike të galerisë, dhe si pasojë e neglizhencës së tyre është lënduar rëndë 31 vjeçari në një nga puset e subjektit minerar “Albchrome”.
Ka qenë sindikata e Minatorëve të Bashkuar të Bulqizës që ka denoncuar ngjarjen, duke thënë se kompania “Albchrome” ia ka hedhur fajin minatorit për ngjarjen, ndërsa thotë se në njoftimin e policisë as nuk bëhet publik emri i kompanisë.
Njoftimi i policisë:
Në vijim të ngjarjes së ndodhur gjatë ditës së djeshme, ku gjatë punës në një galeri kromi u lëndua një shtetas, janë proceduar penalisht nga Policia tekniku i sektorit dhe brigadieri i një subjekti minerar. Nga Specialistët për Hetimin e Krimit në Komisariatin e Policisë Bulqizë, filloi procedimi penal në gjendje të lirë për shtetasit :A. D., 53 vjeç, banues në Bulqizë, (me detyrë teknik sektori në një subjekt minerar). F. K., 48 vjeç, banues në Bulqizë, (me detyrë brigadier), për veprën penale “Shkelja e rregullave të mbrojtjes në punë”. Shtetasit e lartëpërmendur kanë patur detyrimin ligjor për kontrollin e gjendjes teknike të galerisë, ku si pasojë e neglizhencës së tyre, në një nga puset e subjektit minerar, gjatë punës është lënduar dhe ndodhet në spital jashtë rrezikut për jetën E. B., 31 vjeç, (me detyrë fadromist). Materialet procedurale i kaluan Prokurorisë pranë Gjykatës së Shkallës së Parë Dibër për veprime të mëtejshme.
