Ditën e djeshme, një aksident i rëndë u regjistrua në kryeqytet, ku një 24-vjeçarë u aksidentua nga një shofer 19-vjeçar, Jehon Breçani.
Xhesina Gega, 24-vjeçarja që u aksidentua, ka dhënë një intervistë për “ABC”, ku ka treguar të gjithë skenën e tmerrshme që përjetoi.
Për momentin, Gega është në gjendje të stabilizuar tek spitali i Traumës, por këmbën e ka humbur në moment. 24-vjeçarja ka thënë se ka qenë duke pritur në trotuar shoqen e saj, pasi kishin planifikuar të takoheshin. Gjithashtu, konfirmohet se Xhesina Gega nuk ishte shtatzënë, ndryshe nga se u raportua në fillim.
“Mbaj mend të gjithë skenën. Po prisja një shoqe, në këtë moment shoh që më vjen një makinë. Nuk e kam humbur vetëdijen, kisha shumë dhimbje,” ka thënë Gega.
24-vjeçarja ende nuk i ka takuar familjarët, pasi ka thënë se prindërit i ka në Greqi. Gega iu nënshtrua menjëherë operacionit sapo mbërriti tek Trauma, ndërsa mjekët thonë që po bëjnë gjithçka që vajza të mund të ecë sërish.
Mësohet se 19-vjeçari që shkaktoi aksidentin, është djali i ish-zv. drejtuesit të policisë së Shtetit, Erzen Breçani. Jehon Breçani ka qenë duke drejtuar një mjet tip “Benz” në momentin që ka shkaktuar aksidentin e rëndë rreth orës 19:15.
