Ditën e sotme një aksident i rëndë është regjistruar në një zonë të qarkut të Tiranës, përkatësisht në Laknas. Bëhet me dije se 60-vjeçarja me iniciale S.GJ teksa po drejtonte mjetin ka humbur kontrollin si pasojë e problemeve shëndetësore.
Ndërkohë që kur shërbimet e policisë kanë mbërritur në vendin e aksidentit e kanë gjetur 60-vjeçaren pa shenja jete. Njoftohet se grupi hetimor po punon për zbardhjen e rrethanave të ngjarjes.
“Tiranë/Informacion paraprak
Më datë 04.08.2022, në Laknas, shtetasja S. Gj., rreth 60 vjeçe, dyshohet se ka humbur kontrollin mbi drejtimin e automjetit, për shkak të problemeve shëndetësore. Pas mbërritjes së shërbimeve të Policisë, në vendngjarje, kjo shtetase është gjetur pa shenja jete. Grupi hetimor po punon për zbardhjen e rrethanave të ngjarjes”, thuhet në njoftimin zyrtar të Policisë së Shtetit.
Vlen të theksojmë se fluksi i emigrantëve që vijnë gjatë sezonit të verës, bëhet shkak për shtimin e numrit të aksidenteve në rrugë. Gjithashtu emigrantët zënë vendin e parë edhe për numrin e të aksidentuarve në vend gjatë këtij sezoni veror. Kjo vjen për shkak të pakujdesisë së tyre dhe moszbatimit të rregullave të qarkullimit rrugor.
Sipas INSTAT, aksidentet rrugore, në 90,8 % të rasteve, kanë ndodhur si pasojë e sjelljes së drejtuesit të mjetit. Në gjashtëmujorin e parë të vitit 2022, numërohen 581 aksidente rrugore nga ku numri i të aksidentuarve është 821 persona dhe numri i të vdekurve nga aksidentet rrugore është 89 persona.
