Një makinë ushtrie është përfshirë në një aksident në Himarë teksa shoferi ka humbur kontrollin mbi drejtimin e mjetit dhe për pasojë është përplasur me bordurën anësore të rrugës. Shoferi, së bashku me 2 prej ushtarakëve që udhëtonin në këtë mjet, shtetasit G. H., 23 vjeç dhe J. Ll., 32 vjeç, kanë mbetur të plagosur. Ata ndodhen në spitalin e Himarës, jashtë rrezikut për jetën.
“Sot, rreth orës 16:30, në vendin e quajtur “Qafa e Vishës”, shtetasi P. N., 64 vjeç, duke drejtuar një automjet të ushtrisë, dyshohet se ka humbur kontrollin mbi drejtimin e mjetit dhe për pasojë mjeti është përplasur me bordurën anësore të rrugës. 64-vjeçari, së bashku me 2 prej ushtarakëve që udhëtonin në këtë mjet, shtetasit G. H., 23 vjeç dhe J. Ll., 32 vjeç, ndodhen në spitalin e Himarës, jashtë rrezikut për jetën. Grupi hetimor ndodhet në vendngjarje dhe po punon për sqarimin e rrethanave të aksidentit”, thuhet në njoftimin e policisë së shtetit.
Blendi Gonxhe, kreu i Drejtorisë së Përgjithshëm të Transportit Rrugor më herët u shpreh se qeveria do të ndërhyjë sërish për të ashpërsuar masat në Kodin Rrugor.
Gonxhe tha se do të forcohen masat aty ku do të shihet se nuk kanë dhënë efekt ndryshimet e fundit duke iu referuar aksidentit të fundit në Tiranë.
Sipas tij problemet me aksidentet rrugore vjen për shumë arsye, por më kryesorja është për shkak se nuk kemi një kulturë të gjatë në drejtimin e makinës.
“Kur erdhën gjermanët për të bërë analizat e trafikut dhe të aksidenteve, thanë që nuk ka mundësi gënjeni. Thanë se nuk mund të keni këto statistika të shkëlqyera të aksidenteve në fatalitete me këtë problematikë të trashëguar rrugësh, infrastrukture, kulture dhe edukate. Ne kemi vetëm 20 vite në timon, nuk kemi prindërim në timon” tha Gonxhe.
Sipas tij, drejtuesit e makinave në Shqipëri janë më “instiktivët e rajonit ose globit” dhe kemi “aksidentet më të ulëta për egërsinë e trafikut” aq sa të huajt nuk i besojnë statistikat.
