Pasditen e sotme një qytetar ka ndërruar jetë pasi është përplasur për vdekje nga një automjet i llojit “Mercedez Benz”. Ngjarja e rëndë ka ndodhur në qytetin e Lezhës, në aksin rrugor Torrovicë-Lezhë. Mësohet se qytetari ka qenë duke kaluar rrugën në momentin që makina e ka përplasur.
Goditja nga mjeti i ka shkaktuar këmbësorit plagë të rënda. Ai është dërguar në spital për të marrë ndihmën e nevojshme mjekësore, por fatkeqësisht ndërroi jetë si pasojë e plagëve të marra. Sipas informacioneve, viktima quhet Ndue Sokoli.
Ndërsa drejtuesi i mjetit është larguar nga vendi i ngjarjes.
Emri i drejtuesit të mjetit dhe shkaqet e aksidentit nuk dihen ende.
NJOFTIMI I POLICISË
Në rrugën rurale të fshatit Torovicë, Lezhë, mjeti tip “Benz ” ka aksidentuar këmbësorin shtetasin N.S., ku për pasojë ka ndërruar jetë.
Drejtuesi i mjetit ka braktisur mjetin dhe është larguar nga vendngjarja.
Grupi hetimor ndodhet në vendngjarje dhe po punon për sqarimin e plotë të shkakut dhe rrethanave të ngjarjes, si dhe identifikimin e drejtuesit të mjetit.
Kujtojmë se 105 persona humbën jetën në aksidentet rrugore në Shqipëri në gjashtëmujorin e parë të vitit 2021.
Kjo është një shifër e rritur aksidentesh me humbje jete krahasuar me 74 persona të vdekur në të njëjtën periudhë të një viti më parë.
Në muajin Qershor 2021 sipas instat numri aksidenteve është rritur me 7,8 %, krahasuar me të njëjtën periudhë të vitit të kaluar.
Krahasimi gjashtëmujor thotë Instat, paraqitet me një rritje prej 32,9 %, ku numërohen 671 aksidente rrugore nga 505 aksidente të ndodhura në gjashtëmujorin e parë të vitit 2020.
