Ish- ministrja e Bujqësisë Frida Krifca hodhi idenë e krijimit të një Akademie për barinjtë në Shqipëri në nëntor të vitit 2021.
“Është një profesion që është i vështirë dhe duam ta ruajmë dhe do të nxisim të rinjtë, do shkojmë t’i gjejmë, do bëjmë një akademi për këtë dhe do t’i subvencionojmë vetëm për mbajtjen e tufës”– premtonte Krifca asokohe.
Në momentin e deklarimit të kësaj nisme, filluan memet e para duke shkaktuar një valë reagimesh qesharake në rrjetet sociale. Pavarësisht reagimeve të opinionit publik, ish-ministrja e Bujqësisë e mbrojti me fanatizëm këtë nismë duke thënë se kjo traditë të mos shuhej. Sipas saj nëpërmjet kësaj nisme, Shqipëria do bëhej si Zvicra.
‘Shkolla e barinjve është pjesë e një cikli trajnimesh të dedikuara për blegtorët, peshkatarët, fermerët dhe bletarët.’, argumentonte tre vite më parë Ministria e Bujqësisë, teksa e shtrinte ambicien përtej blegtorëve.
Po çfarë përmbante në thelb Akademia e Bujqësisë?
Nisma nuk ishte gjë tjetër veçse cikël trajnimesh për blegtorët në mënyrë që tradita të mos shuhej. Edhe pse kanë kaluar 4 vite nga kjo ide e hedhur në publik, akoma nuk është bërë asgjë në praktikë. Sipas Ministrisë së Bujqësisë “Akademia e Barinjve” është në kompetencë të Universitetit Bujqësor të Tiranës.
Por, habia qëndron në faktin se as Universiteti Bujqësor i Tiranës nuk kishte informacion për këtë iniciativë e aq më pak se ju përket atyre.
Po si çdo premtim tjetër i thënë në opinionin publik edhe këtë herë do mbetemi në kuadër të fjalëve, ku mesa duket me largimin e ish-ministres së bujqësisë u largua dhe idea e “Akademisë së barinjëve”. Ndërkohë sipas statistikave të INSTAT vendi ynë po has një krizë të jashtëzakonshme në fushën e blegtorisë.
Statistikisht blegtoria shqiptare po përjeton krizë, pasi numri i krerëve është pakësuar ndjeshëm dekadën e fundit. Sipas të dhënave nga INSTAT, në 2013 në vend numëroheshin 356 mijë lopë. Në fund të 2023 numri i tyre është pakësuar me 124 mijë, pra 232 mijë më pak.
Disa pyetje që ngrihen: Mos vallë ish-ministrja nuk e kishte raportin e INSTAT kur fliste për këtë ide e më kryesorja “Shqipëria do bëhet si Zvicra” apo edhe këto ishin ëndërrat e ish-ministres?
