Rasti i publikuar në media për sanitarenTire Alldërvishi që zhvaste pacienten me COVID-19 në këmbim të shërbimit, provoi edhe njëherë se sistemi shëndetësor shqiptar është krye e këput i kalbur nga korrupsioni.
Emisioni Stop bëri publike mesazhet ku Tirja i kërkon para vajzës së pacientes së shtruar në Sanatorium në mënyrë që t’i jap shërbimin e nevojshëm.
Tire Alldërvishi, sanitarja që u hoq si infermiere zhvati 8 milionë lekë nga vajza e pacientes që ndërroi jetë, pasi Tirja as nuk e ushqeu. Mbrëmjen e djeshme u publikuan meszhe edhe më dëshpëruese të së ndjerës, ku i lutej Tires për bukë e për ujë në një moment që i kishte rënë edhe diabeti.
Por Tirja nuk është i vetmi rast korrupsioni në shëndetësinë shqiptare. Të gjithëve na ka ndodhur që kur shkojmë në spitale duhet të fillojmë të shkundim xhepat që për rojen te dera. Ata që kanë kaluar sprova me familjarë të sëmurë të shtruar e dinë se nëse inferimeres nuk i fut në xhep “bakshishin”, i afërmi i tyre nuk do të marrë shërbimin e nevojshëm. Më të rënda janë rastet kur detyrohemi të paguajmë mjek që nga një konsultë e thjeshtë e deri për operacione të ndërlikuara që shkojnë në qindra mijëra lekë. Nuk janë të pakta as rastet e korrupsionit në drejtorët e spitaleve, që për një vend pune fusin në xhep mijëra euro.
Por si është shprehja “peshku qelbet nga koka”. Korrupsioni më i rëndë fillon që nga “Ministria e Shëndetësisë dhe e Mirëqenies Sociale”. Tenderat e majmë që kjo ministri jep kohë pas kohe i lënë rrugë “peshqve më të vegjël” që të bëjnë si duan. Është institucioni më i lartë ai që e legjitimon korrupsionin duke qenë vetë më lehtësisht i korruptueshëm.
Në dosjen e publikuar nga SPAK para pak ditësh, u gjetën shkelje në tenderat për respiratorë dhe kite, të cilat ishin blerë tetë herë më shtrenjtë se vlera e tregut. SPAK konstatonte se nuk ishin bërë vlerësime të tregut, por ishte përllogaritur vetëm një mesatare e ofertave të ardhura. Komisionet e ngritura nga Ministria në fjalë dhe nga QSUT as që e kishin “vënë ujin në zjarr” për të konsideruar ofertat, por i zhpenzuan pa kriter paratë e taksapaguesve shqiptarë.
Është e kuptueshme që kjo ministri do të drejtohet në të tillë mënyrë për sa kohë ka në krye një minister me doktoraturë punim plagjaturë, si Ogerta Manastirliu.
Pandemia e COVID-19 vetëm sa e vuri në dukje gropën e madhe që ekziston në shëndetësinë shqiptare e cila është thuajse në kolaps edhe pse nuk pranohet publikisht. Me dënimin e Tires mund të izolohet një rast, por jo korrupsioni. Ai do të vazhdojë, për sa kohë shteti të jetë i korruptuar dhe i kapur nga oligarkët.
