Kërkesa e SPAK-ut për të arrestuar Arben Ahmetaj ka ndezur debate të zjarrta në Kuvend.
Ministri i Drejtësisë tha se mazhoranca po hesht duke ia lënë drejtësisë që të bëjë punën e vet. Ndërkohë kërkoi që të vijohej me rendin e ditës në Kuvend.
“Heshtja jonë sot ka të bëjë me respektin për drejtësinë por jo me respektin për një pjesë të këtyre kolegëve, se kur të vi puna për të na bërë moral për ndershmeri, një pjesë e juaja është fundi i parlamentarizmit. Heshtja jonë ka të bëjë me atë që në 2016 u pajtuam për të votur reformën në drjtësi. Kjo është shërbimi më i mirë që i bëni anti shtetit, krimit. Këto porosi keni marrë nga krimi. Drejtësia të vazhdojë të bëjë punën e vet”, deklaroi Manja.
Ndërkohë ministrja për Shtetin, Elisa Spiropali ishte ajo që mori fjalën në Kuvend për t’i dalë në mbrojtje kryeministrit Edi Rama. Ajo u shpreh se Rama është kryeministër që nuk flet dhe as nuk komenton për drejtësinë. Po ashtu, në fund, ministrja shtoi se argumentet e opozitës në raport me drejtësinë nuk e bëjnë dot pis Ramën.
‘Nuk na kompleksoni dot, nëse doni që t’ju marr shembuj të pafundëm. Ju jeni mësuar me kryeministra që kanë folur e nuk kanë vepruar. Rama nuk flet për drejtësinë, nuk komenton.Nuk e përdor si hanxhar drejtësinë, nuk bën populizëm, por i lë që të bëjnë punën e tyre, duke besuar se ato institucione do përdorin ndërgjegjen e tyre për të bërë drejtës. Nuk ka asnjë gojë dhe asnjë argument që mund ta bëjë Ramën pis në raport me drejtësinë’- tha Spiropali.
