Drejtori i Institutit të Krimeve dhe Pasojave të Komunizmit, Agron Tufa është shpreh se në administratën shtetërore janë qindra ish-sigurimsa të punësuar.
“Ka një kapitull në raportin tim që raportohet për praninë e madhe në institucionet tona të pavarura dhe varura, të administratës nga ish-sigurimsa. Janë me qindra ish-sigurimsa. 519 ish-sigurimsa janë vetëm në Policinë e Shtetit. Apeli im është që të reagojnë ndaj kësaj situate,” – theksoi Tufa në “topchannel.”
Ndër të tjera ai shtoi se kreu i Komisionit të Ligjeve, Ulsi Manja iu ka kërkuar autoriteteve hapjen e dosjeve për ish-sigurimsat që punojnë në shtet. Kjo sipas tij është një shenjë e mbarë.
Gjatë bisedës ai ka theksuar dhe se ditët e fundit ka shpërthyer një debat mes tij dhe disa personazheve të njohur publikë për çështjen e historisë së Luftës Antifashiste Nacional Çlirimtare.
Drejtori i Institutit të Krimeve dhe Pasojave të Komunizmit, Agron Tufa tha se ai dhe familja e tij ndihen të kërcënuar.
Madje ai shprehet se ka lënë një dëshmi se nëse i ndodh diçka, dihet se kush janë autorët e sulmit.
“Kam të bëjë me segmente shume të rrezikshme fanatike të enverizmit, të ish-armës së sigurimit të shteti dhe drejtësisë së dhunshme komuniste dhe njerëzve të veshur me imunitet. Që ndihem i rrezikuar, moralisht kjo ndihet, por ndihem edhe fizikisht. Mesazhe kërcënuese vijnë me anë të personave anonim dhe jo anonim. Kam paralajmëruar që çfarë do që të ndodhë, dihet se kush janë autorët e sulmit,” – paralajmëroi zoti Tufa.
