Vazhdon konflikti mes Agron Tufës dhe Spartak Brahos, nisur që në prill të këtij viti.
Ish- kreu i Institutit për Studimin e Krimeve dhe Pasojave të Komunizmit ka ankimuar vendimin e pushimit të padisë për shpifje ndaj deputetit socialist.
Tufa kërkon nga Gjykata e Apelit që të riçelë gjykimin ndaj Brahos me akuzën për shpifje, teksa i ka deleguar avokatit çdo tagër, për shkak se ndodhet në Zvicër së bashku me familjen e tij ku ka kërkuar azil Politik.
Para disa ditësh, Prokuroria e Apelit pushoi çështjen penale ndaj Spartak Brahos, pasi sipas saj nuk provohet vepra penale për fyerje dhe shpifje, dhe se padia e Tufës nuk përmbush kushtet ligjore.
Tufa reagoi fill pas këtij vendimi, duke paralajmëruar se do publikonte disa padi më të rënda.
Disa ditë më vonë, Agron Tufa publikoi disa dokumente në Facebook dhe akuzoi Spartak Brahon se ka firmosur dënimin me vdekje të minorenit Gjergj Hani gjatë periudhës së diktaturës.
Pak kohë më parë, shkrimtari dhe ish-drejtori i Institutit për Krimet e Komunizmit, ka marrë kërcënime për vdekje.
Kjo bëri që Tufa të largohet në Zvicër, ku edhe ka kërkuar azil politik.
