Kandidati për kryetar i Partisë Demokratike, Agron Shehaj ka thënë se nëse ai fiton, nuk do të ketë bashkëqeverisje me Ramën. Ai tha se përballë Ramës duhet një lider i pakorruptuar, duke lënë të kuptohet se Basha mund të mos jetë i tillë.
“Nëse unë zgjidhem kryetar i PD në asnjë mënyrë nuk do të ketë bashkëqeverisje. Nuk besoj se Basha është lider i korruptuar. Një gjë duhet të shpjegoj. Çështja është kjo. Përballë Ramës duhet një lider krejt ndryshe nga Rama. Duhet të jetë i pakorruptuar, por dhe që njerëzit ta shohin ashtu. Nuk mjafton ta themi, por dhe të dukemi ashtu siç themi”, tha Shehaj.
Ai nuk tha nëse do e largonte Berishën nga grupi parlamentar nëse zgjidhet në krye të PD duke mos pranuar të komentonte.
“Jemi të vetëdijshëm që lideri histori ka kontribut në orientimin drejt perëndimit të PD. Personalisht nuk dua të jap asnjë koment mbi këtë çështje” ka thënë Shehaj.
Për zërat kundër tij, Shehaj tha se është e drejta e tyre dhe se stili i tij i lidershipit është që të ndjekë parimin e meritokracisë, gjë që sipas tij në PD mungon.
“E drejta e tyre të kenë këtë mendim që kanë. Mendoj se është pikërisht kjo na ndan me një pjesë, dhe me stilin e lidershipit. Mendoj që një kandidat i PD mund të ketë vota personale. Kandidatët duhet të shtyheshin të merrnin vota personale. Kjo ka të bëjë me stilin e drejtimit të PD duke mos ndjekur parimin e meritokracisë, ku promovohet më i zoti. Meqë sulmohem për këtë çështje, unë mendoj se në zgjedhjet e kaluara jo vetë u duhej thënë që kush do dalë mirë do ndëshkohet, por kush del më mirë do promovohet. Një nga problemet kryesore të PD është mungesa e meritokracisë. Vlerësohen ata që punojnë. Vetëm në këtë mënyrë mund të mposhtim Edi Ramën”, tha ai.
Shehaj komentoi edhe faktin që Basha e promovoi atë në vitin 2017 si kandidat për Vlorën, e më pas në këto zgjedhje në Tiranë. Ai tha se nuk ka asgjë personale me Bashën, ndërsa shtoi se pd duhet të ndryshojë lidershipin që të fitojë zgjedhjet.
“Nuk ka asnjë arsye personale që të më shtyjë mua të garoj për kryetar? Jam bindur se Basha fatkeqësisht nuk e çon drejt fitores. Është bindje personale, nuk ka lidhje me të. E kuptoj që shumë prej jush mund të kërkojnë arsye por është shumë e thjeshtë. Nëse duam që PD të fitojë zgjedhjet dhe pastaj të ndryshojë Shqipërinë duhet me se s’bën të ndryshojmë lidershipin. Kjo është e vetmja arsye”, ka thënë Shehaj.
