Kancelarja gjermane, Angela Merkel, u shpreh se Afganistani është duke kaluar orë të dhimbshme dhe se qeveria gjermane po përpiqet të nxjerrë sa më shpejt nga vendi qytetarët e saj. Merkel theksoi në një takim me kristjandemokratët se Gjermania po mbështetej te trupat e SHBA-së që mbajnë kontrollin e aeroportit në Kabul, për të mundësuar evakuimin.
Kancelarja tha se Gjermania do të mbështesë vendet fqinje të Afganistanit, nëse do u duhet të përballen me një fluks të pritshëm të refugjatëve. Por janë talibanët ata që do të kontrollojnë se kush do të ketë mundësinë të largohet nga vendi.
Në SHBA, republikanët po e shtojnë presionin mbi presidentin Biden pas ardhjes në pushtet të talibanëve islamikë në Afganistan. Lideri i opozitës në Senat, McConnell, kritikoi se tërheqja e dështuar dhe evakuimi i furishëm i amerikanëve dhe punonjësve të ndihmës afgane ishte një dështim i turpshëm i udhëheqjes amerikane.
Shtetet e Bashkuara e kishin pasur mundësinë për ta shmangur katastrofën. Republikania Cheney tha se Afganistani tani po tregon se çfarë do të ndodhë, po të tërhiqet Amerika nga bota. Aleatët e amerikanëve pyesin veten nëse mund të mbështeten ende te Shtetet e Bashkuara, shkruan DW. Përveç Bidenit, gjithashtu është fajësuar edhe ish-presidenti Donald Trump për situatën e krijuar.
