Ish-ministri i Brendshëm, Dritan Demiraj ka sqaruar ditën e sotme me anë të një postimi në rrjetet sociale, për opinionin publik deklaratën e tij të bërë mbrëmjen e djeshme në një intervistë, për sjelljen e afganëve në Shqipëri.
Demiraj thotë se është deformuar dhe është nxjerr nga konteksti ajo çfarë ai ka thënë.
Ai ka shkruar se është detyrë dhe nder për Shqipërinë që të japë kontributin e saj dhe të strehojë çdo refugjatë që i kërcënohet jeta. Më poshtë gjeni sqarimin e plotë të Dritan Demiraj.
Deklarata e plotë:
Sqarim për opinionin publik!
Gjatë një interviste për Syri.tv ditën e djeshme, pyetjes së gazetarit në lidhje me çështjen e refugjatëve Afganë në Shqipëri, krahas të tjerash, si ushtarak dhe si ish Komandant i një sërë misionesh në Afganistan, ku kam parë dhe prekur nga afër realitetin Afgan, nuk do ishte etike që të mos ndaja me opinionin publik disa shqetësime mbi aspektet e sigurisë të cilat duhet të mbahen në konsideratë duke patur parasysh kulturën, traditat, arsimimin e refugjatëve Afganë përkundrejt shoqërisë tonë.
Për fat të keq, si jo pak herë në Shqipëri, ajo çfarë pashë sot në disa portale ishtë deformimi total i kontestit të intervistës duke bërë shkëputje dhe montazh të fjalëve të veçanta të intervistës dhe duke krijuar lajme apo tituj bombastikë për të patur një klikim më shumë.
Madje disa portale shpreheshin që deklarata ime në lidhje me kulturën konservatore të popullit Afgan, ishtë deri në kufijt e racizmit… Mendoj që sot nuk është as vendi dhe as momenti për të patur “tituj bombë” për klikime, apo qëllime të tjera në ‘backstage”.
Si rrjedhojë, ndjej detyrim sqarimin e opinionit publik dhe atyre portaleve, media dhe gazetarë profesionistë të vendit tonë si më poshtë:
Nëse të deklarosh “që duhet të kemi kujdes pasi me vendosjen e refugjatëve Afganë në Qytet Studenti është rrezik i madh” pasi në atë vendqëndrim, agjencitë tona të shërbimeve inteligjente dhe ligjzbatuese do ta kenë shumë të vështirë të monitorojnë dhe mbajnë nën mbikqyrje me kapacitet të plotë situatën – quhet “racizëm” , atëherë “racizëm” le të jetë…
Nëse të deklarosh që “duhet të kemi kujdes pasi në Qytet Studenti kemi fëmijët e studentët tanë dhe kultura Afgane është totalisht konservatore dhe totalisht kontraditore me kulturën tonë si në sjellje, veshje, qëndrime, komunikime etj”, dhe duhet të kemi kujdes në trajtimin e kësaj çështje – quhet “racizëm” , atëherë “racizëm” le të jetë…
Nëse të japësh shembuj konkret se shqetësimet që unë ngrita gjatë intervistës së djeshme i ilustrova me ngjarje që kanë ndodhur në vende të tjera të Europës si Gjermania dhe Franca duke thënë kështu që “duhet të kemi kujdes pasi sulme terroriste dhe përdhunime kanë ndodhur dhe në vendet më të zhvilluara të Europës” – quhet “racizëm”, atëherë “racizëm” le të jetë…
Le të jem unë “racist-i” i cili i bëj thirrje të gjithë palëve të vendit tim si qeveri, institucione të sigurisë, opinion publik, shoqëri civile etj.. “që është detyre jona që të kushtojmë kujdes të veçantë shqetësimeve që historia ka treguar që kanë ndodhur dhe në vendet më të zhvilluara”.
Është detyrë dhe nder për Shqipërinë që të japë kontributin e saj dhe të strehojë çdo refugjat që i kërcënohet jeta, pa dallim feje, ngjyre, krahine apo ideje….por gjithashtu është detyra jonë që të jemi vigjilent!
Dhe nëse për të qenë dhe treguar vigjilencë e kujdes për vendin tonë, familjet tona si dhe ato bij dhe bija nënash që ne strehojmë do të duhet një “kokë turku” qe ta quajmë “racist”, atëherë, le të jem unë ai “racist”!
