Ditën e sotme Partia Demokratike ka vijuar me pyetjet ndaj qeverisë në lidhje me aferën e inceneratorëve.Gjatë një deklarate për mediat Koordinatorja për Media dhe Komunikim në PD, Silvi Bardhi deklaroi se inceneratorët nuk janë ndërtuar akoma siç është rasti i Tiranës, dhe ato që janë ndërtuar nuk punojnë, si në rastin e Elbasanit dhe Fierit, e ndërkohë pagesat me vlerë 80 mijë euro në ditë vazhdojnë për Tiranën, shumë që del nga xhepat e taksapaguesve të kryeqytetit.
DEKLARATA E PLOTË
Qeveria Rama mburret me tre inceneratorë: Të Tiranës, Elbasanit, dhe Fierit.
Është një mburrje e kushtueshme, sepse kostoja e tyre ka kapur e kaluar 430 milionë eurot. Numërimi vazhdon edhe me 80 mijë euro në ditë për Tiranën, shumë që del nga xhepat e taksapaguesve të kryeqytetit.
Partia Demokratike, prej muajsh, ngulmon me fakte dhe prova, që pasqyrojnë një mega-aferë.
Incenerator nuk ka, si në rastin e Tiranës, dhe inceneratorët nuk punojnë, si në rastin e Elbasanit dhe Fierit.
Por, mos merrni fjalët tona për prova.
Shumë prej jush e shohin gjendjen e mjedisit, të grumbullimit të mbeturinave në rrugët, lagjet dhe qytetet e tyre.
Nëse jeni të pakënaqur, nëse jetoni në një rrugë, lagje apo qytet të papastër, si në Tiranë, Elbasan apo Fier, ka diçka që nuk shkon.
Janë ca pyetje që duhen bërë.
