Ministria e Infrastrukturës dhe Energjisë do të shpallë së shpejti një garë ndërkombëtare për të dhënë me koncesion ndërtimin dhe operimin e Aeroportit të Vlorës.
Kjo nismë vjen pasi kompania turke e cila shprehu interes për ndërtimin dhe menaxhimin e kësaj vepre, nuk arriti të marr dritën jeshile. Kujtojmë se qeveria shqiptare kishte bërë një marrëveshje mes konsorciumit turk të tre kompanive Cengiz, Kalyon dhe Kolin Construction.
Sipas Ministrisë së Infrastrukturës dhe Energjisë në lidhje me këtë aeroport ka përfunduar afati ligjor për koncesionin që në shtatorin e vitit të kaluar. Ministria konfirmon zyrtarisht se për ndërtimin e kësaj vepre do të ketë një garë ndërkombëtare.
“Lidhur me aeroportin e Vlorës. Ka përfunduar afati i ligjit për koncesionin e ‘Vlora International Aeroport’ që në shtator të vitit 2018. Konfirmojmë zyrtarisht se do të ketë një garë ndërkombëtare për ‘Vlora International Aeroport’ pasi interesi është i madh nga investitorët. Dhe ky proces do të përmbush të gjitha kushtet ligjore dhe elementët e transparencës.”
Sipas Ministrisë së Infrastrukturës dhe Energjisë, gara do të përmbajë kushtet e ndërtimit, operimit, transferimit për kompaninë që do të dalë fituese. Kjo kompani që do të ndërtojë aeroportin do të jetë një koncension për 35 vite e më pas do ta transferojë veprën në pronësi të shtetit shqiptar.
Sipas një studimi fizibiliteti, vlera e investimit për të ndërtuar Aeroportin e Vlorës është 98 milionë euro, ndërsa në 3 vitet e para mendohet një fluks prej 600 mijë udhëtarësh në vit.
Aeroporti i Vlorës do të ndërtohet në Akërni, një zonë me distancë 10 minuta larg rrugës kombëtare Fier-Vlorë.
