Policia e Krujës ka arrestuar një 19-vjeçar dhe shpalli në kërkim një 17-vjeçar, pasi dyshohet se ata tentuan të vrisnin xhaxhanë e tyre.
Arrestimi i Fatbardh Maliu dhe shpallja në kërkim e vëllait të tij ka ndodhur pas një ndërhyrjeje të policisë pranë banesës së familjes Mali në Bubq.
Sipas policisë, dy vëllezërit kanë kanosur xhaxhanë e tyre me armë zjarri, konkretisht një kallashnikov. Gjatë përpjekjes për të parandaluar ngjarjen, edhe babai i dy vëllezërve është kërcënuar me vrasje nga ata.
Ngjarja ka filluar disa ditë më parë, pasi Fatbardh Mali dhe vëllai i tij kishin mashtruar gjyshin duke i kërkuar para për problemet që pretendonin të kishin me persona të tjerë.
Kur xhaxhai mësoi për mashtrimin, ai denoncoi nipat në komisariatin e Krujës. Pasi u thirrën në polici, dy vëllezërit nuk u paraqitën dhe vendosën të shkonin në banesën e xhaxhait për ta kërcënuar me vrasje nëse nuk tërhiqte kallëzimin.
Policia ka sekuestruar kallashnikovin që dyshohet se është përdorur në kanosje dhe ka nisur hetime për dy të rinjtë lidhur me aktivitete të tjera, duke dyshuar se ata janë të përfshirë edhe në trafikun e lëndëve narkotike.
Puna për kapjen e 17-vjeçarit dhe dokumentimin e plotë të ngjarjes vazhdon.
