Raporti i fundit i INSTAT zbardhi një tjetër të vërtetë “të hidhur” që është vënë në praktikë kohë më parë, por ka marrë vëmendje nga manovrat e fundit të Qeverisë. Sipas raportit, shqiptarët renditen të dytët në Evropë me orët më të gjata të punës, ndërsa Administrata punon 3.7 orë më pak në javë se të tjerët.
Ky fakt mbështetet edhe nga vendimi i një dite më parë nga qeveria, e cila vendosi që të reduktojë orët e punës për punonjësit e administratës në oraret 9.30-15.30, duke e ulur me dy orë nga orari normal, për shkak të motit të nxehtë.
Ndërsa sot, është propozuar që punonjësit të caktojnë vetë fashë orarin se kur duan të punojnë, vendim i cili u shtohet “halleve” të qytetarëve e punonjësve të thjeshtë. Këta të fundit gjithmonë kanë shprehur pakënaqësi për mënyrën sesi Administrata i ka ardhur në “ndihmë” për shërbime të ndryshme. Me propozimin e ri ata do të detyrohen t’i ndjekin “këmba-këmbës”, pasi zyrat do të jenë bosh dhe s’dihet se kur Administrata fillon orarin e punës.
Administrata që joshet me “qoka” për 1 like 1 Koment në postimet e “thurrura” me propagandë nga Qeveria, po favorizohet gjithnjë e më shumë.
Theksojmë se edhe përpara këtij ndryshimi, ata që punojnë në administratë kishin orët më të shkurtra të punës në vend. Sipas të dhënave të INSTAT, për punonjësit në aktivitetin ekonomik “Administrim publik, Shërbimet Sociale, dhe aktivitete e shërbime të tjera”, në vitin 2023 punuan 40 orë në javë, ose 3.7 orë më pak se mesatarja e të punësuarve të tjerë.
Nga të punësuarit me pagë në vend, orët më të gjata janë në prodhim (46.5) ndërtim (45.6). Me kohë të gjata punojnë dhe të punësuarit në tregti, bare e restorante, hotele, shërbime të biznesit e administrative, që mesatarisht shpenzojnë 45.1 orë në javë. Edhe në bujqësi puna zgjat 44.8 orë në javë, shkruan Revista Monitor, referuar të dhënave të INSTAT.
Për krahasim, mesatarja europiane për punonjësit e shërbimit dhe të shitjeve është rreth 35 orë. Menaxherët në Europë kanë orare më të zgjatura, me mesatarisht 41.2 orë, duke u renditur të dytët që punojnë më shumë. Rekordin në Europë për punë me kohë të zgjatur e mban bujqësia, me 42.4 orë. Nivelin më të ulët e kanë profesionet elementare me rreth 32 orë në javë.
