Një video e publikuar këtë të premte nga gazetari Osman Stafa ka hapur debat mbi funksionimin e trajtimeve onkologjike në vend dhe mënyrën si organizohen seancat e kimioterapisë gjatë periudhave të pushimeve të stafit mjekësor. Në reagimin e tij, Stafa ngriti pyetjen e drejtpërdrejtë: “A njeh kanceri pushim?”, duke vënë në qendër shqetësimin për shtyrjen e trajtimeve që, sipas protokolleve mjekësore, duhet të respektojnë intervale të rrepta kohore.
Sipas tij, një pacient me kancer që duhet të kryente radhën e radhës të kimioterapisë në intervalin standard prej 21 ditësh, është njoftuar se seanca do të shtyhet deri të martën, duke e zgjatur ciklin në 25 ditë. Ai nënvizon se kjo lëvizje përtej protokollit ngre pikëpyetje të forta mbi funksionimin e shërbimit dhe prioritetet që vendosen në momente të tilla.
Në komentimin e tij, Stafa thekson se stafi mjekësor ka të drejtë të qëndrojë në pushime, por ngre dilemën thelbësore: a prevalon e drejta e mjekut për pushim, apo e drejta e pacientit për të marrë trajtimin në kohën e duhur, ashtu siç përcaktohet në protokollet për mposhtjen e sëmundjes?
Postimi i plotë:
A njeh kanceri pushim?
Mjekët duhet të bëjnë pushime, por cila prevalon, e drejta për pushim, apo e drejta për trajtim sipas protokollit, me qëllim mposhtjen e kancerit.
A është korrekte që sot, e premte, një pacient me kancer, që duhet të bënte kimioterapi (marrim njëherë në 21 ditë) duhet ta bëj këtë së paku të martën, pas 25 ditëve.
Nëse lejohet, atëherë pse protokolli thotë që kimio duhet të bëhet njëherë në 21 ditë?
