Ish-Presidenti i Shqipërisë, Ilir Meta ka reaguar në lidhje me lajmet që qarkullojnë për një arrestim të mundshëm të tij. Në një intervistë për News 24 ai tha se qarkullimi i një lajmi të tillë nuk përbën një habi për të dhe theksoi se nuk i trembet, pasi sipas tij SPAK ka treguar se ka standarde të dyfishta dhe se merr direktiva nga Kryeministri Rama.
“Kam qenë shumë më herët në SPAK, kam qenë dhe për të paraqitur shumë kallëzime për persona që kanë kryer akte të rënda penale. Kam qenë një ndër kallëzuesit kryesor edhe në kohën kur isha President. Është një institucion i standardeve të dyfishta. Nuk i trembem, nuk jam i habitur që SPAK zbaton direktivat e Ramës. Nuk besoj se duhet të jetë askush i habitur që në çështje të rënda si inceneratorët, nuk guxojnë të përmendin emrin e Ramës. Këto janë të qarta dhe janë evidente.”-tha Meta.
