Disa ditë pas tensioneve në qendrat e KZAZ-ve, në disa qytete të Shqipërisë, ditën e sotme do të mblidhet Kolegji Zgjedhor për të shqyrtuar ankimin e bërë nga Idajet Beqiri.
Ky i fundit ka kërkuar që partia e tij “Uniteti Kombëtar” të çregjistrohet nga zgjedhjet e 30 qershorit.
Kërkesa e Beqirit u hodh poshtë nga KQZ, me argumentin se dekreti i Presidentit është antikushtetues dhe nul, pra nuk do të zbatohet.
Pas vendimit të KQZ, çështja kaloi në Kolegjin Zgjedhor i cili do të japë edhe fjalën e fundit sot.
Nëse Kolegji Zgjedhor do të pranojë kërkesën e Idajet Beqirit për t’u çregjistruar atëherë bëhet i ligjshëm dekreti i Metës. Por nëse Kolegji vendos të kundërtën, pra të rrëzojë kërkesën e Idajet Beqirit, sikurse bëri edhe KQZ, atëherë rrëzohet dhe dekreti i Metës dhe zgjedhjet zhvillohen ne 30 qershor, me vendim gjykate.
Nga ana tjetër maxhoranca në KQZ vijon me mbledhjet për zgjedhjet e 30 qershorit dhe po zhvendos qendrat e votimit në qytetet ku drejtojnë PD dhe LSI, në mjedise që nuk varen nga bashkitë.
E ndërsa, nga ana tjetër opozita vazhdon të theksojë se në 30 qershor nuk do të ketë zgjedhje. Madje ditën e premte në mbrëmje, opozita mbajti protestë në Tiranë para Kryeministrisë e Parlamentit.
