Vaksinimi i mësuesve me AstraZeneca në vendin tonë do të vazhdojë. Ky është vendimi që kamarrë Komiteti Kombëtar i Imunizimit, pavarësisht se vaksina është pezulluar në shumë vende europiane për shkak se ka pasur mpiksje të gjakut tek personat që janë vaksinuar me të.
Ka qenë ministrja e Shëndetësisë, Ogerta Manastirliu ajo që e ka bërë të ditur lajmin. Nga Fieri ajo ka deklaruar se nuk ka pasur përqindje jo të lartë të refuzimit të kësaj vaksine, duke thënë se vaksinimi nuk është me detyrim dhe se ata që nuk vaksinohen tani mund të marrin dozën më vonë.
“Aktualisht nuk ka pasur përqindje alarmante pasi bëhet një vlerësim para se të kryhet vaksina. Shihet gjendja e mësuesve, nëse mjeku klasifikohet për bërë vaksinën. Vaksina nuk është e detyrueshme por është e këshillueshme. Dje ka pasur një mbledhje të Komitetit Kombëtar të Imunizimit që ka vendosur vijimin e procesit të vaksinimit”, tha Manastirliu.
Ditën e djeshme kryeministri Rama deklaroi se kishte pasur një bisedë edhe me autoritetet në Londër lidhur me këtë situatë dhe ata e kanë siguruar se nuk ka pasur probleme me vaksinimet që po kryhen në Britaninë e Madhe.
Disa vende të Bashkimit Europian mes të cilave Gjermania, Itali, Franca e Spanja e kanë pezulluar përkohësisht vaksinimin me AstraZeneca, ndërsa OBSH dhe Agjencia Europiane e Barnave kanë deklaruar se vaksina është e sigurt.
