Çmimi i karburanteve në bursë prej javësh ka rënë ndjeshëm, por Bordi i Transparencës në Shqipëri nuk ka ndryshuar vendimet që janë aktualisht në fuqi, ku një litër naftë shitet me 199 lekë.
Ndërkohë që zërat që Bordi i Transparencës duhet të ‘shkrihet’, për aq kohë sa nuk po merr vendime që i përshtaten qëllimit për të cilin është krijuar, ministrja Balluku ka një reagim mbi këtë çështje. Balluku shpjegon funksionin e Bordit të Transparencës, që çuditërisht nuk e kemi parë, që prej krijimit të tij. Gjithashtu sipas ministres duke qenë se çmimi është stabilizuar ka qenë në diskutime tema për ta ndaluar së funksionuari, por vendimi final i përket Ministrisë së Financave.
Në mungesë të Bordit, monitorimi do të bëhet nga ana e shtetit.
“Bordi nuk ka synim të lehtësoj kostot, por transparencën. Bordi nuk vendos dhe as nuk e ul dhe as nuk e ngre çmimin. Por bën transparente metodologjinë. Se ka një bursë dhe përmes kësaj metodologjie vendoset çmimi tavan. Bursën nuk e lëviz as topi. Bordi mblidhet kur ka ndryshim çmimi. Nuk e vendosim dot ne se kur mblidhet bordi” tha Balluku.
“Duke qenë që çmimi është stabilizuar, kemi një diskutim për ndalimin e të funksionuarit. I përket Ministrisë së Financave dhe do jetë i mirëpritur si vendim. Shteti do të monitoroj edhe nëse bordi nuk do të jetë ekzistues.” përfundoi ministrja.
