Çfarë do të ndodhë me Covid-19 në vjeshtë? Një gjë është e sigurt: Nuk ka marrë fund. Diçka të tillë e konfirmon edhe kreu i Urgjencës Kombëtare, Skënder Brataj. Në një intervistë për Abc Neës, Brataj ka thënë se priten infektime edhe nga varianti “Delta” i virusit, i cili po përhapet me shpejtësi në botë. Ai tha se vaksinimi sjell optimizëm dhe nëse arrin në shifrën 2 milionë, situata mund të bëhet e menaxhueshme. Brataj u shpreh se virologët parashikojnë edhe një valë tjetër në vjeshtë, jo e përmasave që kaluam, por sërish ka jetë njerëzish që duhen mbrojtur.
“Sot po thoshte një virolog i Universitetit të Milanos, që varianti “Delta” do të shkaktojë infektime në vjeshtën e ardhshme. Sigurisht që do të presim infektime nga “Delta”. Ata njerëz që nuk janë vaksinuar apo kaluar sëmundjen në një mënyrë apo tjetër do të atakohen.
Sigurisht që na bën më optimistë vaksinimi në Shqipëri. Po të kapet 2 mln (vaksinime) brenda vjeshtës, situata do të jetë më e menaxhueshme, por nuk e dimë se cfarë do vijë.
Nuk mund të flasim kaq lirshëm. Virologët parashikojnë një valë tjetër në vjeshtë, do të jetë edhe “vala e bishtit” të kësaj pandemie, jo e atyre përmasave që kaluan, por janë jetë njerëzish që duhen mbrojtur. Nuk ka marrë fund”, ka thënë Brataj.
