Teksa shumë vende po mësojnë si të bashkëjetojnë me Covid-19, duke u rihapur pas izolimit për shkak të pandemisë, ekspertë botëror dhe OBSH kanë paralajmëruar se virusi do rikthehet në vjeshtë, duke u bërë thirrje vendeve të jenë me këmbë në tokë.
Për më tepër, ditën e djeshme gjatë konferencës së përditëshme në Gjenevë, shefi i OBSH-së Tedros Adhanom Ghebreyesus, bëri me dije se situata nga koronavirusi po përkeqësohet.
Mirëpo, së fundmi mjeku i njohur, Pëllumb Pipero, ka dhënë shpresa se virusi nuk do kthehet më asnjëherë.
Në një intervistë për Syri Tv, infeksionisti komentoi situatën e krijuar në vend pas shtimit në numra rekord të rasteve me koronavirus, duke u bërë thirrje qytetarëve që të kenë kujdes, ndërsa tha se kjo ka ardhur nga mosrespektimi i masave.
Ndërkohë, Pipero tha se nuk do ketë një valë të dytë të koronavirusit në vjeshtë ose dimër, pasi virusi vazhdon ta humbasë virulencën në mënyrë graduale
“Unë mendoj që nuk do ketë një rikthim të virusit në vjeshtë ose në dimër. Në rast se do ketë kthim, kurrë nuk do jetë me i egër dhe e fortë, por më i butë për disa arsye. Kjo pasi virusi vazhdon ta humbasë virulencën në mënyrë graduale,” tha ai.
Arsyet e tjera, sipas Piperos, lidhen me faktin se kapacitetet mjekësore në vend janë rritur, ndërsa ndërgjegjësimi i qytetarëve është shtuar.
Nga ana tjetër, po punohet për vaksinën ose për një kurë për virusin dhe së shpejti do ketë rezultate, teksa shtoi se nëse ky virus kishte shumë të panjohura në fillim, tani ai është një virus i njohur për mjekët dhe shkencëtarët.
Dita e sotme është pasuar me një shpërthim rastesh me koronavirus, duke u regjistruar 36 raste të reja në 24 orët e fundit, numri më i lartë i rasteve të reja në vendin tonë që nga fillimi i epidemisë.
Numri i të shtruarve në spital ka arritur në 41, ku dy pacientë janë në intubim, ndërsa 4 në terapi intesive, ndërkohë numri i të prekurve në total në Shqipëri ka shkuar në 1,299 persona.
