Javën që lamë pas ministrja e Arsimit Besa Shahini komunikoi planin për përfundimin e procesit mësimor, pas anulimit të tij më 9 mars për shkak të pandemisë.
Shahini bëri me dije vijimin e mësimit online deri në 28 maj për nxënësit nga klasa 1-11 dhe rikthimin e maturantëve në shkollë për konsultime lidhur me provimet e maturës.
Mirëpo, maturantët, përveç zhvillimit të 4 provimeve, kanë edhe një event të rëndësishëm në jetën shkollore, siç është mbrëmja e matures, që fatkeqësisht këtë vit nuk do zhvillohet.
Shahini u shpreh në komunikimin e saj të fundit se festat që nuk mundësojnë distancimin social mes nxënësve.
“Për fat të keq, jo. Mbrëmjet e maturës nuk do të lejohen. Janë festa që nuk mundësojnë distancimin social mes nxënësve, kështu që sivjet ato duhet të anulohen dhe të gjejmë forma të tjera për të festuar”, njofton Shahini.
Për tu rikthyer te provimet, Shahini njoftoi se duke filluar nga data 4 maj do të ketë komunikime të përditshme nga ana e Rezana Vrapit, drejtore e Qendrës së Shërbimeve Arsimore (QSHA) mbi elemente dhe detaje të ndryshme të provimeve.
“Paralelisht, platforma akademi.al ka xhiruar pyetje dhe zgjidhje të detyrave për provimet kryesore në matematikë dhe shkenca, të cilat do t’i transmetojnë në RTSH. Kështu që, jam e bindur që sivjet do të jeni më të përgatitur se kurrë më parë për të bërë provimin e maturës”.
Ndërsa për rikthimin në shkollë më 18 maj të tyre, ministrja ka sqaruar se nuk është i detyrueshëm dhe se ata mund të punojnë individualisht në shtëpitë e tyre, pa bërë konsultim, mjafton të njoftojnë drejtorin e shkollës.
“Kthimi në shkollë nuk është i detyrueshëm. Ne po i hapim shkollat për maturantët ekskluzivisht për shkak se ju keni kërkuar që të keni konsultime me mësuesit tuaj përpara se të bëni provimin e maturës. Ndaj, nëse ndiheni që mund të bëni provimin e maturës pa e bërë këtë konsultim, ju mund të qëndroni në shtëpi gjatë kësaj kohe, të punoni individualisht, por duhet të njoftoni drejtorin e shkollës para 11 majit, në mënyrë që të planifikojmë uljen e nxënësve nëpër klasa dhe distancimin social për ata që shkojnë në shkollë”.
