Sot, më 9 maj, festohet Dita e Evropës, një ditë që simbolizon paqen, unitetin dhe fillimet e integrimit evropian.
Kjo datë përkujton deklaratën historike të ministrit të Jashtëm francez, Robert Schuman, i cili në vitin 1950 propozoi një formë të re bashkëpunimi mes kombeve të Evropës.
Në një fjalim të mbajtur në Paris, Schuman i bëri thirrje Francës, Gjermanisë dhe vendeve të tjera të kontinentit që të bashkonin prodhimin e qymyrit dhe çelikut, dy industri kyçe për fuqinë ushtarake në atë kohë.
Ideja ishte të vendosej kontrolli i përbashkët mbi këto burime, për të shmangur luftërat dhe për të ndërtuar një Evropë të bashkuar. Traktati për krijimin e këtij institucioni u nënshkrua një vit më pas dhe shërbeu si gur themeli për atë që sot njihet si Bashkimi Evropian.
Dita e Evropës u shpall zyrtarisht festë në vitin 1985, gjatë Samitit të Milanos, dhe që atëherë është një nga simbolet kryesore të identitetit evropian.
Ajo festohet jo vetëm në vendet anëtare të BE-së, por edhe në shtete si Shqipëria dhe Ukraina, për të promovuar vlerat e demokracisë, bashkëpunimit dhe solidaritetit.
Institucionet e BE-së shënojnë këtë ditë duke hapur dyert për publikun, më 2 maj në Strasburg dhe më 9 maj në Bruksel e Luksemburg, duke e kthyer atë në një festë të hapur për qytetarët.
Megjithëse 9 maji është pranuar gjerësisht si Dita e Evropës, disa grupe mbështesin gjithashtu datën 5 maj, që përkon me themelimin e Këshillit të Evropës dhe thekson vlerat e të drejtave të njeriut dhe barazisë.
