Radiotelevizioni Shqiptar ndodhet zyrtarisht në një krizë të thellë financiare. Këtë e konstaton vetë drejtoresha e sapoemëruar e institucionit, Eni Vasili, në muajt e parë të mandatit të saj. Në një komunikim zyrtar me Ministrinë e Financave, ajo ka kërkuar fonde shtesë për vitin 2025, duke paralajmëruar se situata aktuale rrezikon pagesat ndaj punonjësve dhe kontraktorëve të jashtëm.
Vasili, e cila mori drejtimin e RTSH pas një periudhe të trazuar me shkarkimin e Alfred Pezës, më pas të gjithë Këshillit Drejtues dhe një drejtoreshë të komanduar gjatë tranzicionit, ka bërë të ditur se menaxhimi i mëparshëm ka qenë i pakontrolluar. Sipas saj, abuzimet e shumta kanë çuar në boshatisjen e arkës së institucionit, i cili mbështetet financiarisht nga tarifat dhe taksat që paguajnë qytetarët.
Në letrën zyrtare të dërguar Ministrisë së Financave, Vasili evidenton dy burime kryesore të krizës: mungesa e të ardhurave të parashikuara dhe abuzimet me kontratat dhe trajtimin e punonjësve. Vetëm për pagesat e detyrimeve ndaj punonjësve të larguar padrejtësisht nga puna, deri në 31 maj, RTSH ka pësuar një humbje prej mbi 730 mijë euro. Nëse humbjet gjyqësore vazhdojnë, kjo shifër mund të arrijë në 4 milionë euro.
Një tjetër problem i rëndë janë kontratat për të drejtat televizive. Sipas dokumenteve të dërguara në Ministri, dëmi arrin në rreth 4 milionë euro, ku më shumë se gjysma e kësaj shume janë shpenzime të paplanifikuara në buxhet.
Në total, abuzimet e konstatuara nga Vasili llogariten në rreth 8 milionë euro, që përbëjnë një të tretën e buxhetit vjetor të RTSH, i cili kap vlerën e 25 milionë eurove nga taksat e qytetarëve dhe fondet publike.
Përpara kërkesës për 2 milionë euro shtesë për vitin 2025, Vasili ka paralajmëruar një auditim të plotë të strukturës dhe projekteve të RTSH, duke shprehur gatishmërinë për transparencë dhe bashkëpunim me drejtësinë. Ajo është e para drejtuese që flet hapur për abuzimet në këtë institucion, një temë që prej vitesh ka mbetur tabu, pavarësisht përkeqësimit të cilësisë së programeve dhe rënies së ndjeshme të audiencës.
Letra e drejtuar Ministrisë së Financave, e siguruar nga Dosja.al, nuk ka marrë ende një përgjigje zyrtare. Por përtej kërkesës për financim, zbardhja e një dëmi kaq të madh ekonomik brenda një institucioni publik ngre pikëpyetje serioze mbi menaxhimin e tij ndër vite dhe nevojën për ndërhyrje të menjëhershme institucionale.
