Në tenderin e hapur për koncensionin për aeroportin e Kukësit, deri më tani ka ardhur vetëm një ofertë. Sipas një njoftimi të Ministrisë së Infrastrukturës, janë dy kompani shqiptare që kanë ofruar të investojnë një shumë prej rreth 8 milionë eurosh, për aeroportin e qytetit verior.
Mësohet se dy kompanitë janë “Bami SHPK” dhe “Global Technical Mechanics”. Sipas marrëveshjes, “Global Technical Mechanics” do të ketë 70 % të aksioneve, ndërsa “Bami SHPK” 30%.
Asnjë prej këtyre kompanive nuk ka eksperiencë në menaxhimin e aeroporteve, por sipas Ministrisë së Infrastrukturës, në ofertën e paraqitur, bashkimi i dy shoqërive shqiptare ka dorëzuar edhe një marrëveshje me kompaninë hollandeze NACO, e cila ka një eksperiencë të gjerë ndërkombëtare në menaxhimin e aeroporteve.
“Bami SHKP” është një kompani ndërtimi e themeluar në vitin 1998 dhe zotërohet nga Besnik Bami. Ndërsa “Global Technical Mechanics” është krijuar në mars të vitit 2017 nga Ridgers Mema, ish zv-drejtor i “Autostar Albania” dhe grupit “Kastrati”.
Sakaq, mësohet se Ministria ka marrë në shqyrtim ofertën për të vendosur nëse do të pranohet apo jo.
(Top Channel)
