Teksa qeveria ka miratuar paketën e dytë financiare për t’i ardhur në ndihmë familjeve dhe bizneseve të prekura nga pandemia, duket se ka ende subjekte që nuk kanë aplikuar për paketën e parë.
Drejtoresha e Tatimeve, Delinda Ibrahimaj ka bërë me dije se nga paketa e parë janë dhe 3,800 biznese që mund të përfitojnë, por ajo tha se ata nuk kanë aplikuar.
Në një intervistë për “Open”, Ibrahimaj u shpreh se për këta biznese kanë mundësi që të aplikojnë deri të martën dhe tha se numri i të punësuarve është deri në 6,500.
“Janë 3800 biznese që nuk kanë aplikuar nga paga e luftës edhe pse do e përfitonin. Do kenë mundësi të aplikojnë deri në ditën e martë të javësh së ardhshme. Janë rreth 6500 persona që do përfitojnë këtë pagë, por kjo duhet të verifikuar rast pas rasti. Ky është numri maksimal potencial”, tha Ibrahimaj.
Kujtojmë se nga paketa e parë, biznesi i vogël përfitoi 731 milionë lekë, teksa Rama tha se në total numri i personave që do të përfitojnë nga biznesi i vogël është 6,0440, ndërsa shuma është 1.57 mld lekë të reja.
Po ashtu, Ibrahimaj tha se të gjitha pagat e luftës do të merren pavarësisht gabimeve që mund të kenë bërë aplikuesit gjatë aplikimit.
“Ka raste kur aplikuesit bëjnë gabime në aplikim ose kanë vendosur gabim Ibanin e bankës. Kjo ka bërë që paga e tyre mos të procesohet në bankë. Por ftoj biznesin dhe qytetarët që për çdo paqartësi të bëjnë ankesën”- tha Ibrahimaj.
