Tre vëllezër me origjinë nga Dibra dhe banues në Tiranë janë arrestuar ditën e sotme nga policia.
Falë operacionit “Brodhers”, tre vëllezërit janë arrestuar, pasi i kishin marrë 50 mijë euro një shtetasi në Tiranë.
Nëpërmjet kërcënimeve të vazhdueshme se do e vrisnin atë dhe familjen e tij, tre vëllezërit dibranë kishin mundur t’i merrnin shumën e madhe shtetasit nga Tirana.
Njoftimi i Policisë
Policia bën me dije se në kuadër të operacionit “BROTHERS”, nga Drejtoria Vendore e Policisë Tiranë dhe Prokuroria e Krimeve të Rënda, vihen në pranga tre vëllezër, pasi i kishin vënë gjobë 50 mijë euro një shtetasi.
Në vijim të punës për parandalimin e ngjarjeve të rënda kriminale ndaj jetës dhe pronës, Sektori i Krimeve të Rënda ndaj Jetës dhe Pronës në DVP Tiranë, nën drejtimin e Prokurorisë pranë Gjykatës së Shkallës së Parë për Krime të Rënda Tiranë, pas një pune të mirëorganizuar disa javore duke përdorur edhe metoda speciale hetimi, finalizoi me sukses operacionin “BROTHERS“, si rezultat i të cilit u kapën dhe ndaluan shtetasit:
Xh. T., 23 vjeç,
E. T., 32 vjeç,
A. T., 32 vjeç, të tre lindur në Dibër dhe banues në Tiranë
Nga hetimet e deritanishme ka rezultuar se këta shtetas në bashkëpunim me njëri-tjetrin, kanë tentuar t’i marrin në formë gjobe një shumë prej 50 mijë euro një shtetasi, nëpërmjet kërcënimeve të vazhdueshme për jetën e tij dhe të familjarëve.
Materialet do t’i kalojnë për ndjekje të mëtejshme Prokurorisë pranë Gjykatës së Shkallës Parë për Krime të Rënda, për veprat penale “Shtrëngimi me anë të kanosjes ose dhunës për dhënien e pasurisë” e kryer në bashkëpunim.
