Në kuadër të projektit të “Unazës së Madhe” në zonën e ‘5 Majit’, qindra banesa janë projektuar për t’u shembur nga IMT. Një pjesë e banorëve nuk kanë pranuar kontratat e propozuara nga bashkia, ku thuhet se do të përfitojnë kompensim të plotë nëpërmjet shkëmbimit të pronës së tyre me objektet e reja që do të ndërtohen në lagjen e re me të njëjtat metra katror. Sipas tyre ajo është e njëanshme dhe nuk ka vlerë ligjore.
Liza Marku, e moshuara që është kthyer në simbolin e protestës së banorëve të “5 Majit” ka dalë kundër legalizimit të kanabisit që është edhe një nga 12 pyetjet e Këshillimit Kombëtar, nismë e kryeministrit Edi Rama.
E ndodhur në rrugë, teksa proteston me fqinjët e saj, nënë Liza tha se shqiptarëve nuk u duhet droga e legalizuar, por shtëpitë.
“Po legalizon drogën, pse legalizon drogën, legalize shpiat? Ç’është kjo punë, nxjerr popullin e vet përjashta dhe thotë hajde legalizojmë kanabisin. Na nuk duam drogë, duam shtëpitë tona,”- tha ajo ndërtë tjera.
Kujtojmë së banorët e “5 Majit” javën e kaluar kanë depozituar një kallëzim penal në Prokurorinë e Posaçme. Përfaqësuesja e tyre ligjore, Adriana Kalaja në një deklaratë për mediat ka bërë me dije se kanë bërë kallëzim penal ndaj kryeministrit Edi Rama, Arben Ahmetajt, Elisa Spiropalit, Erion Veliajt, Gledis Nanos dhe Artan Lames. Ajo thotë se kush është e përfshirë në këtë aferë duhet t’i nënshtrohet hetimit, ndërsa ka shtuar se rindërtimi nuk është në interes të qytetarëve.
