Numri i të infektuarve në vendin tonë është 186, teksa mbrëmjen e sotme është shënuar edhe viktima e 9, pasi një 52-vjeçare nga Vlora ka ndërruar jetën pas 4 ditësh në terapi intesive.
Nga ana tjetër, deri tani janë shëruar 31 persona, të cilët kanë dalë nga Infektivi dhe gëzojnë shëndet të plotë.
Mbrëmjen e sotme, mjeku Pipero ka treguar dhe ilaçet që janë përdorur nga mjekët për kurimim e tyre:
“Njerëzit e shtruar tek ne kurohen sipas eksperiencës më të mirë të marrë nga Kina, nga Italia dhe vendet e tjera. Kurohen sipas një udhëzuesi që përfshin dy anti-viralë, simptomatikë të tjerë. Ndërkohë që flasim, ka ardhur një sasi e vogël hidroksilklorine. Në bazë të protokolleve të një kompanie të madhe amerikane, kemi porositur një medikament të ri që është shpresëplotë për trajtimin e koronavirusit”, tha mjeku.
Edhe një herë mjeku u shpreh se nga java e dytë e prillit do zbuten masat e vendosura nga qeveria për karantinimin dhe pritet ulje e rasteve me koronavirus.
“Unë mendoj që javën e dytë të prillit do fillojnë të zbuten shumë masat dhe nëse qytetarët i kanë respektuar masat e krijuara nga qeveria, java e fundit të marsit, java e parë e prillit do zbuten masat”, ka thënë Pipero.
