Rreth 4500 mjete nuk kanë shlyer detyrimet për taksa në të gjithë qarkun e Gjirokastrës.
Mes debitorëve janë edhe 130 mjete, që u përkasin 28 institucioneve shtetërore dhe ndërmarrjeve në varësi të tyre.
Kjo bën që ata të ngarkohen edhe me kamat-vonesa.
Gati 1500 mjete kanë taksa të mbartura që prej vitit 2012.
Pjesa më e madhe e kësaj kategorie lidhet me emigrantë shqiptarë që jetojnë jashtë vendit.
Vonesat në shlyerjen e këtyre detyrimeve pengon në një masë të madhe regjistrimin e mjeteve të reja dhe përpilimin e kontratave të shit-blerjes.
Sipas specialistëve lokalë, të cilët kanë folur për Top Channel, sistemi ka nevojë të çlirohet nga barra fiktive edhe për një pjesë të mjeteve që nuk kanë qenë në funksion pas 2012, sidomos prej atyre që kanë shkuar për skrap.
Sipas parashikimeve lokale, në fund të 2020 qarku i Gjirokastrës pritet të ketë në qarkullim jo më shumë se gjysmën e numrit të mjeteve të vitit 2000.
