Një ngjarje tragjike ka ndodhur të martën në mbrëmje në plazhin Karon të Phuketit, Tailandë, ku një grua shqiptare humbi jetën pasi u mbyt në det, vetëm pak orë pas mbërritjes në ishullin turistik së bashku me bashkëshortin e saj.
Viktima është identifikuar si Daniela Idrizi, 41 vjeç, ndërsa lajmi u konfirmua nga autoritetet lokale dhe Spitali Chalong, ku ajo u shpall zyrtarisht e vdekur rreth orës 18:00 të ditës së martë.
Sipas dëshmisë së bashkëshortit të saj, Mohamed Alsaba, 43 vjeç nga Egjipti, çifti kishte mbërritur në Phuket rreth orës 14:00 dhe po qëndronin në një hotel në zonën Tambon Karon, ku kishin planifikuar të kalonin tre ditë pushimi.
Rreth orës 16:00, ata kishin shkuar në plazh. Pasi hyri në ujë për të notuar, gruaja nisi të përballej me vështirësi pas rreth 10 minutash.
Pavarësisht ndërhyrjes së menjëhershme të rojeve bregdetare, e ndjera u nxor nga deti pa ndjenja. Përpjekjet për ta reanimuar në spital rezultuan të pasuksesshme.
Autoritetet tajlandeze kanë nisur hetimet për të sqaruar rrethanat e sakta të mbytjes, ndërsa pritet që trupi t’i nënshtrohet autopsisë.
Ndërkohë, ambasada shqiptare në Bangkok është vënë në dijeni dhe po ndjek procedurat për riatdhesimin e trupit dhe mbështetjen e familjarëve.
