Për 41 orë ende vijon pa ndërprerje zjarri në magazinën e qendrës tregtare ‘Casa Italia”. Deri më tani është arritur hapja e disa tyneleve ventiluese me qëllim uljen e temperaturave në katin minus 1.
Zjarri ka përfshirë gjithë katin nëntokësor, që ka shërbyer si magazinë për të gjitha produktet, të cilat tregtoheshin në gjashtë katet e qendrës tregtare.
Sipas ekspertëve, temperaturat e larta nga thuajse dy ditë zjarr pandërprerje, rrezikohet dhe shembja e ndërtesës.
Edhe pse forcat e zjarrfikësve vijojnë kërkimet akoma nuk ka asnjë gjurmë nga 33 vjeçari, Arjan Sala, i cili dyshohet se ka mbetur brenda banesës.
33-vjeçari, i cili rezulton i zhdukur, ka qenë i pari që ka rendur për të evakuuar të gjithë punonjësit që ndodheshin në magazinë, duke shmangur tragjedinë, por fatkeqësisht nuk mundi të dilte dot
Ai u fut 24 orë më parë për të shpëtuar punonjësit e magazinës nëntokësore, duke tentuar të fikë zjarrin me një bombol në dorë, së bashku me dy kolegët e tij, të cilët arritën të dalin.
Kujtojmë se ditën e sotme, bëri thirrje dhe Presidenti Ilir Meta për ndërhyrjen urgjentë në shuarjen e zjarrit.
Me anë të një postimi në rrjetet sociale, Meta iu drejtua me një kërkesë të qartë drejtuesve të Ministrisë së Brendshme dhe asaj të Mbrojtjes, strukturave të Mbrojtjes Civile dhe në veçanti Shërbimit Zjarrfikës të ndërpresin aktivitetet politike dhe të ndërhyjnë me urgjencë.
