Në arkën e shtetit për periudhën janar-gusht mungojnë rreth 35 milionë euro të ardhura.
Kjo ka sjellë uljen e investimeve, ndërsa bilanci buxhetori ka kaluar në terren negativ, shkruan “Shqiptarja.com”.
Të ardhurat për periudhën 8 mujore, kanë qënë rreth 305.9 miliardë lekë.
Edhe pse shifra është më e madhe sesa e një viti më parë, në raport me objektivat e vendosura nga Kuvendi i Shqipërisë, kemi të bëjmë me një nivel të ulët.
Tatimi mbi Vlerën e Shtuar është një nga zërat që ka zhgënjyer sërish.
Kjo për shkak se planifikimi ka qenë 98.9 miliardë, ndërsa shifra e mbledhur është 90.4 miliardë lekë.
Ndërsa zërat e tjerë në sektorin e të ardhurave janë në terren pozitiv.
Këtu përmendim tatimin mbi fitimin, që i ka sjellë buxhetit të shtetit 24.6 miliardë lek nga 22.1 miliard që ishin planifikuar.
Kurse tatimi mbi të ardhurat personale ka sjellë 31.7 miliardë le, nga 28.3 miliard që ishin planifikuar.
Përsa i përket shpenzimeve buxhetore, deri në fund të gushtit kanë qenë 309.4 miliard lek, nga 313.6 miliardë që ishin planifikuar.
Ndërkohë për pagesat e interesave të borxhit publik janë shpenzuar 22 miliardë e 777 milion lekë, kurse për bonusin e bebeve janë paguar 1 miliard e 430 milion lekë.
Në total nga 43.7 miliardë të planifikuara, janë shpenzuar vetëm 38.1 miliardë lek.
Bazuar në këto shifra, buxheti rezulton me deficit 3.5 miliardë lek, ndërsa një vit më parë u regjistrua sufiçit në masën 4.1 miliardë lek.
